Në të njëjtën kohë kur Gjykata Supreme e Shteteve të Bashkuara i dha të drejtë administratës së Donald Trump, duke përcaktuar se ekzistojnë vetëm dy gjini biologjike – mashkull dhe femër – në dokumentet zyrtare, në Tiranë po zhvillohen debate të kundërta në frymën e politikave “pro-europiane”, që synojnë përfshirjen e nocioneve të reja gjinore në legjislacionin shqiptar.
Vendimi historik i Gjykatës Supreme amerikane, i marrë më 7 nëntor 2025, e konsideron gjininë si fakt biologjik të pandryshueshëm dhe e ndalon ndryshimin e saj në pasaportë apo dokumente të tjera identiteti. Me këtë vendim, SHBA rikthen politikën që njeh vetëm gjininë e lindjes, duke hequr opsionin e tretë “X” që ishte futur gjatë administratës Biden.
Ky zhvillim është përshëndetur si fitore e logjikës biologjike dhe e vlerave tradicionale nga kampi konservator amerikan. Sipas Gjykatës, “shfaqja e seksit të mbajtësve të pasaportës sipas të dhënave të lindjes nuk shkel parimet e mbrojtjes së barabartë”, duke e cilësuar politikën e re si një “konfirmim të realitetit natyror”.
Në kontrast të plotë, në Shqipëri, përfaqësues politikë dhe organizata të shoqërisë civile po nxisin përfshirjen e termave “identitet gjinor” dhe “orientim seksual” në ligjet e reja për barazinë dhe të drejtat civile — një qasje që kritikët e konsiderojnë si përpjekje për të zbehur nocionin biologjik të gjinisë dhe për të importuar modele kulturore të huaja që nuk përkojnë me realitetin shoqëror vendas.
Kështu, ndërsa Amerika konservatore kthehet drejt biologjisë dhe faktit natyror, Shqipëria duket se ecën në drejtim të kundërt, mes retorikës “për integrim europian” dhe debateve të nxehta mbi ruajtjen e vlerave tradicionale e fetare në shoqëri. / bota-islame.com
